• شاعير: دكتر مرتضي مجدفر

• رسام: سام سلماسي

• طراح گرافيك: فريبا بندي

•  ۲۰صحيفه، دؤرد رنگ، اعلا كاغاذ، گلاسه جيلد، ۳۲۰۰۰ريال.

بوُ كيتابدا، ايندييه قدر علمي و تربيتي اثرلري، هم ده توركجه حئكايه‌لري و ترجمه‌لري ايله تانينان دكتر مرتضي مجدفر، اوُشاق شاعيري آدي ايله ميئدانا چيخميشدير. كيتابا مجدفرين ۷ اوُشاق شعري سالينمشدير. شعرلرين تركيبي حالتلري واردير. يعني بوُ كي مجدفر، ايش‌لرله عائيله عضولريني بير- بيرلري ايله قوْووشدورموش و تعليم – تربيه باخيميندان تلفيقي بير ايش گؤرموشدور. شعرلرين عنوانلاري بئله دير: بوُ «چيچك‌چي» آتام دير/ منيم « آنام» خياط دير/ «پرستار»دير منيم عمه‌م/ «طياره‌چي» عميم‌دير/ «معلم»دير خالاجان/ «سوروجو» دوُر بؤيوك آتام/ «كيتاب ساتان» داييم دير.

شعري اوْخويان اوُشاق، عين زاماندا، هم ايشلرله تانيش اوْلور، هم ده عائيله عضولرينه محبت بسله‌يير و اوْنلارلا عاطيفي ايلگي قوُرور. ائله بوُنا گؤره،كيتابين اوستونده فارسجا يازيلان بوُ عيبارتي گؤروروك: «آموزش واحدهاي كار آشنايي با مشاغل و آشنايي با اعضاي خانواده در قالب شعر براي كودكان مناطق ترك‌نشين.»

بوُ كيتابا آذربايجانلي يازيچي و تدقيقاتچي ابراهيم اصلاني، فارسجا بير مؤخره (سوْن سؤز) يازميشدير. اوْنون «سخني با پدران، مادران و مربيان واحدهاي پيش‌دبستاني و مهدكودك» باشليقلي مطلبينده، بوُ شعرلردن نئجه اوُشاق باغچالاريندا و كودكستانلاردا فايدالانماق حاققيندا معلومات وئريلير. اوْ يازيسيندا تربيتي باخيميندان شعرله ياناشير و كيتابين اؤزلليكلريني ايضاح ائدير. اصلاني، پيشگامان پژوهش‌مدار انتشاراتي‌نين مسئول مديري دير.

كيتابين سوْنوندا بير صحيفه‌ليك سؤزلوك «معني برخي واژگان و اصطلاحات تركي موجود در كتاب» آدي ايله گؤزه دگير. باخ گؤر كيم دير؟ نه‌چي‌ دير؟ كيتابي‌نين شكيللريني، گنج صنعتكار سام سلماسي چكميشدير. شعرلرين گؤزه‌ چارپمايان بير اؤزلليگي ده واردير و اوْ دا بوُ دوُر كي اوْنلاردا جنسيت فرقي يوْخدور. يعني شعرلري اوْخويان هر اوْغلان يا قيز، اؤزلريني شعرلرده عكس ائتديريب، جانلانديرا بيلرلر. بوُ كيتابا شكيل چكن رسام دا، بوُ اؤزلليگي چوْخ گؤزل شكيلده حياتا كئچيرميشدير و دئمك بوُ كي، شكيللرين هاميسيندا قيز و اوْغلان بيرليكده حاضيرديرلار.

پيشگامان پژوهش‌مدار كيتاب ائوي‌نين شعاري بوُ دوُر: «اوُشاقلاريميز آنا ديللرين ياددان چيخارتماماليديرلار. كيتابلاري الده ائدين و اوُشاقلارين الينه چاتديرين. ان ياخشي تحفه اوُشاقلار اوچون، اوُشاق كيتابي دير.»

• شاعير: اوُستاد حبيب فرشباف آقايي

• رسام: وقار فرشباف آقايي

•علمي ناظير: دكتر مرتضي مجدفر

•طراح گرافيك: فريبا بندي

•  ۳۶صحيفه، دؤرد رنگ، اعلا كاغاذ، گلاسه جيلد، ۴۲۰۰۰ ريال.

بوُ كيتابا تانينميش آذربايجانلي شاعير، ائل خاديمي و معلم اوُستاد حبيب فرشباف ين ۱۸ اوُشاق شعري سالينميشدير. بوُ شعرلرين عنوانلاري بئله‌دير: دۀ او نه دير؟ / باهار/ ياي/ پاييز/ قيش/ گونش و قار/ منيم قيزيم/ قيزيم/ تولدون مبارك/ مدرسه‌دن گلنده/ باجاريق/ سوت/ قوْيونوم/ تولكو و قارقا/ باليق اوْلاجاغام/ پيشيگيم و مستان پيشيك.

كيتابا آذربايجانلي يازيچي و تدقيقاتچي دكترمرتضي مجدفرين ايكي مطلبي علاوه ائديلميشدير. مجدفر، بوُ كيتابين علمي ناظيري اوْلاراق، «سخني با پدران، مادران و مربيان پيش‌دبستاني» عنوانلي بير فارسجا يازيدا، بوُ شعرلردن نئجه تعليم- تربيه ايشلرينده  فايدالانماغي ايضاح ائدير. اوْ دئييركي تعليم و تربيه وزارتخاناسي‌نين يئني وئرديگي تدبيره گؤره، اوُشاقلار، اوُشاق باغچالاري و كودكستان‌لاردا اؤز آنا ديللرينده سؤيله‌نيلن  شعرلر و حئكايه‌لردن فايدالانمالي‌ديرلار. ائله همين ايضاحا گؤره، كيتابين اوستونده «مجموعه‌ اشعاري براي نوباوگان مهدهاي كودك، نوآموزان واحدهاي پيش‌دبستاني و دبستان‌هاي مناطق ترك‌نشين» عيبارتي‌ده گؤزه چارپير. مجدفر، هم ده بوُ كيتابا «سؤزلوك» آدلي اوچ صحيفه‌ليك آرتيرما(ضميمه) حاضيرلاميشدير. بوُ سؤزلوكده بعضي سؤزلر، اصطلاحلار و بيت‌لر ايضاحلانير.

جيلدين دالي قابيغي اوستونده، اوُستاد فرشبافين شكيلي و ييغجام صورتده ترجمه حاليني اوْخويوروق. كيتابين شكيللريني اوُستادين صنعتكار قيزي وقار خانم چكميشدير. اوْ ايندي توركيه‌نين اوُشاق يايين ائولرينه ياخيندان اوُشاق كيتابلاريني حاضيرلامادا يارديم گؤسترير. اوْنون اثرلري توركيه‌ده چوْخ ماراقلا آلقيشلانير.